Қысқы универсиаданың ашылуында туды алып шығу мәртебесі кімге бұйырды?

Италияның Турин қаласында  13 қаңтарда  ХХХІІ Дүниежүзілік қысқы универсиада басталады, деп хабарлайды Orda.kz.

Ғылым министрлігінде айтылғандай, Универсиаданың ашылуында Аяулым Әміренова мен Абылайхан Сүлейменов ту ұстап шығады.

Аяулым Әміренова - фристайлдан Қазақстан құрамасының көшбасшыларының бірі. 

«Оның қоржынында 2017 жылғы Еуропа Кубогінің алтын, күміс және қола жүлделері бар. Қазақстан атынан екі олимпиада ойындарына қатысты: 2018 жылы Пхенчханда және 2022 жылы Бейжіңде» деп жазылған министрлік хабарламасында.

Абылайхан Сүлейменов-астаналық «Номад» хоккейшісі, бірнеше халықаралық жарыстарға қатысушы. Соның ішінде, АҚШ-тағы алдыңғы Қысқы Универсиада хоккей турнирінің қола жүлдегері.

XXXII Дүниежүзілік Қысқы Универсиада 2025 жылғы 13-23 қаңтар аралығында Туринде өтеді. Ойындарда спорттың 11 түрі бойынша жарыстар қарастырылған. Қазақстан олардың сегізінде ұсынылған: шайбалы хоккей, фристайл, тау шаңғысы спорты, биатлон, шаңғы жарысы, (шаңғы жарысын қоса алғанда), шорт-трек, мәнерлеп сырғанау, шаңғымен спорттық бағдарлау.

Универсиадаға Қазақстаннан барлығы 103 спортшы қатысады. Қатысушылардың бірінші тобы 9 қаңтарда Италияға жол тартады.