Қыркүйек айынан бастап қыздарға екпе егіледі

Қыркүйек айынан бастап еліміздегі барлық қыздарына папилома вирусына қарсы екпе егіледі. 

Бұл туралы бас санитарлық дәрігер Айжан Есмағамбетова хабарлады.

9 млрд теңгеден астам сомаға 350 мың доза вакцина сатып алынды.

«Бұл вакцина АҚШ та өндірілген  GlaxoSmithKline - бельгиялық вакцина. Сапасы бүкіл әлемде дәлелденген және жүзден астам елде қолданылып жүрген төрт валентті Гардасил-4 вакцинасын сатып алып жатырмыз», - деп жауап берді ол Мәжіліс сыртында.

Айжан Есмағамбетова республикадағы талаптарға да тоқталды: вакцина міндетті түрде тіркелуі керек, Гардасил ғана емес, кез келген вакцинаның әрбір партиясы елге кіргізілерде үнемі тексеріледі, қауіпсіздігі мен сапасын растайтын барлық құжаттар қаралады.
Ол сондай-ақ вакциналаудан кейін аздаған реакция болуы мүмкін екенін атап өтті.

«Температураның жоғарылауы, шамалы ісіну аз уақыт ішінде өтеді, сондықтан, әдетте, инъекция орнында ісіну пайда болса да, бұл мектептен босатуға себеп емес», - деп нақтылады бас дәрігер.

Денсаулық сақтау министрлігінің мәліметінше, жатыр мойнының қатерлі ісігін вакциналау арқылы алдын алуға болады. Статистикаға сүйенсек, Қазақстанда жыл сайын жатыр мойнының қатерлі ісігінен 2 мыңға жуық әйел тіркеліп, 600-ге жуық әйел көз жұмады. Сонымен қатар, әйелдер арасында жатыр мойнының қатерлі ісігі сүт безі ауруынан кейін екінші орында тұр. 

Бұл екпе әйелдер арасында  патологиялық  ауруды 90% -ға төмендетуге мүмкіндік береді.
Вакциналау 6 ай аралықпен 2 кезеңде жүргізіледі.