Қырғызстанның экс-министрі мен оның ұлы 8 жылға сотталды

Қырғызстан Республикасының бұрынғы табиғи ресурстар, экология және техникалық қадағалау министрі Динара Құтманова мен оның ұлы Кемелбек Құтманов 8 жылға сотталды, деп хабарлайды Orda.kz. 

Бішкек қаласының Первомай аудандық сотының үкімі бойынша Динара Құтманова қылмыстық кодекстің «Қызмет бабын асыра пайдалану» бабы бойынша кінәлі деп танылды. Экс-министрдің мүлкі тәркіленіп, үш жыл мерзімге дейін мемлекеттік қызмет атқару құқығынан айырылды. Ал ұлы Кемелбек Құтманов аса ірі көлемде алаяқтық жасағаны үшін айыпталды. 

Первомай аудандық сотының баспасөз қызметі хабарлағандай, мұндай шешім 5 ақпанда шыққан.

Екеуі де табиғи ресурстар, экология және техникалық қадағалау министрлігінде қызмет атқара отырып, Қырғызстандағы ең ірі «Құмтор» кен орнын игеруден түскен қаражатты заңсыз пайдаланған. 

2023 жылдың жазында анасы мен ұлының 2021 жылдан бастап жыл сайын 3 млн 700 мың доллар шамасында қаражат жымқырып келгені анықталды. Бұл ретте, Қырғызстанның есеп палатасының қорытындысына сәйкес министрлік 720 млн сомды мақсатсыз пайдаланған. Ал  мемлекетке келтірілген залал 192 млн сом болды.

Экс-министр 2023 жылдың шілдесінде ұсталды. Ол министр қызметін 2021 жылдың қазанынан 2023 жылдың наурызына дейін атқарды. Ал ұлы - Кемел Құтмановқа халықаралық іздеу жарияланды. Күдікті Түркияда ұсталып, 2023 жылдың қазан айында Қырғызстанға экстрадицияланды.