Қырғызстанға 37,2 миллиард теңгенің бензинін заңсыз шығарған қылмыстық топ ұсталды

Қазақстанда жанар-жағармайды заңсыз экспорттаумен айналысқан қылмыстық топтың әрекеті әшкереленді, деп хабарлайды Orda.kz.        

Қаржылық мониторинг агенттігі Бас көлік прокуратурасының үйлестіруімен АИ-92 маркалы бензинді Қырғыз Республикасына контрабандалық жолмен шығарған топқа қатысты тергеуді аяқтады.

Тергеу мәліметінше, қылмыстық топ құрамында тоғыз адам болған. Заңсыз схеманы жүзеге асыру үшін олар 12 заңды тұлғаны тіркеп, сол арқылы мұнай өнімдерін сатып алу, құжат жүзінде рәсімдеу және шетелге шығару жұмыстарын жүргізген.

Бензиннің шығу тегін заңдастыру және оны шетелге өткізу мақсатында күдіктілер «Қара Май ОйЛ» және «Petro Bazis» ЖШС-нің мини-мұнай өңдеу зауыттарын пайдаланған. Ресми түрде бұл кәсіпорындар бензинді жеңіл дистилляттармен немесе еріткіштермен араластыру (компаундтау) қызметін көрсеткен. Алайда іс жүзінде олардың қызметі ешқандай технологиялық өңдеусіз бензинді теміржол цистерналарына құюмен ғана шектелген.

Кейіннен жалған құжаттар рәсімделіп, бензин «ароматты көмірсутектер қоспасы», «еріткіштер» немесе «жеңіл көмірсутектер қоспасы» ретінде көрсетілген. Осылайша, мұнай-химия өнімдері ретінде рәсімделген бензин заңсыз түрде Қырғыз Республикасына, оның ішінде ел ішінде жанармай тапшылығы байқалған кезеңде де шығарылып отырған.

Заңсыз экспортталған бензиннің жалпы көлемі 190 мың тоннадан асқан. Ал қылмыстық топтың көлеңкелі айналымы 37,2 миллиард теңгеден жоғары болған.

Жедел-іздестіру шаралары барысында «Түрксіб» станциясында Қырғызстанға жөнелтілмек болған шамамен 500 тонна заңсыз бензин тиелген сегіз теміржол цистернасы ұсталды. Құны 138 миллион теңгені құрайтын тәркіленген жанармай мемлекет кірісіне өткізілді.

Қылмыстық іс сотқа жолданды. Қазақстан Республикасы Қылмыстық-процестік кодексінің 201-бабына сәйкес өзге ақпарат жария етуге жатпайды.

Оқи отырыңыз:

• Мораторий аяқталды: Қазақстанда жанармай бағасы көтерілуі мүмкін
• Еліміздегі бензин мен дизель отынының бағасын мемлекет реттемейді
• Қырғыз шенеунігі неліктен Қазақстаннан бензин сатып алынбайтынын айтты
• 300 тоннадан аса жанар-жағармай материалдарын заңсыз әкетпек болғандарға тосқауыл қойылды