Қырғызстанда TikTok бұғатталмақ

Алдағы күндері Қырғызстанда TikTok қызметіне қолжетімділік толығымен шектеледі. Цифрлық даму министрлігіне қарасты Байланыс саласындағы реттеу және қадағалау қызметі елдегі барлық интернет-провайдерлерге тиісті хат жолдап үлгерді.

Бұл туралы Kaktus.media хабарлайды.

Хатта Ұлттық қауіпсіздік жөніндегі мемлекеттік комитеттің TikTok қырғыз сегментіндегі, әсіресе «балалар ақпараттық кеңістігіндегі» мазмұнды цензураға жүйелі көзқарастың жоқтығына назар аударғаны атап өтілген.

«Балалардың денсаулығына, олардың зияткерлік, психикалық, рухани-адамгершілік дамуына зиян келтірмеу үшін Қырғыз Республикасы аумағында TikTok ақпараттық қызметіне қол жетімділік шектеліп, 2024 жылдың 18 сәуіріне дейін жазбаша жауап беруіңізді сұраймыз» деп хабарлайды Ұлттық қауіпсіздік комитеті заңға сілтеме жасап.

Бұл қызметке қол жеткізуге байланысты проблемалардың туындауы бірінші рет емес. 2023 жылдың тамызында Қырғызстан Мәдениет министрлігі TikTok-тың елдегі қызметін тоқтату туралы шешім қабылдады, бұл қоғамда кең реакция тудырды. Содан кейін Цифрлық даму министрлігі де провайдерлерден қызметті дереу бұғаттауды талап еткен болатын.