Қырғызстанда мемлекеттік криптовалюта биржасы құрылды

Қырғызстанда алғашқы мемлекеттік крипто биржасы Coin National Exchange құрылды. Оның жарғылық капиталы 100 миллион сом, деп хабарлайды Orda.kz.       

Қырғыз Республикасының Қаржы министрлігінің мәліметі бойынша, «Монета ұлттық биржасы» ААҚ ресми түрде Әділет министрлігінің реестріне енгізілді.

«Компанияның негізгі қызметі – қаржы нарықтарын басқару. Бүгінде Қырғыз қор биржасы, BTS биржасы, EVDE әмбебап биржасы және бірқатар крипто биржалары осы санатта жұмыс істейді» деп жазылған хабарламада.

Coin National Exchange – мемлекеттік ұйым. Компанияның жалғыз акционері Қаржы министрлігі, ал басшысы ретінде Биболот Мамытов аталды.

Бұған дейін Қырғызстанның Экономика және сауда министрлігі елдегі криптовалютаны заңдастыруды ұсынған болатын. Виртуалды активтер саласындағы тиісті заң жобасы қоғамдық талқылауға шығарылды.