Қырғызстанда «Барон» аталып кеткен есірткі картелінің жетекшісі қолға түсті

Қырғызстанның Ұлттық қауіпсіздік мемлекеттік комитеті «Барон» деген лақап атпен танымал есірткі картелінің басшысын ұстағанын мәлімдеді, деп хабарлайды Orda.kz.

Ведомствоның хабарлауынша, ұйымдасқан қылмыстық топтың төрт мүшесі, атап айтқанда — Д.Л.К., Д.Р.Е., К.Я.К. және Д.К.Ю. есімді азаматтар ұсталып, уақытша ұстау изоляторына қамалған.

Тергеу барысында негізгі күдікті «Барон» аталып кеткен адамның сыған этноқауымдастығының жетекшісі екені және оның жақын туыстарымен бірге есірткі саудасын қаржыландырып келгені анықталды.

ҰҚМК дерегінше, бұл топ Шу өңірі арқылы Қазақстан мен Ресейге аса ірі көлемде есірткі тасымалдаумен айналысқан. Қылмыстық жолмен келген қаражатты заңдастыру мақсатында топ мүшелері аң терісінен тігілген киімдер сату және Германия мен АҚШ-тан көлік әкелу схемасын қолданған.

Сонымен қатар, арнайы қызмет бұл топ Камчыбек Асанбектің (белгілі қылмыс әлемінің серкесі Камчи Көлбаев) құрылымына қаржылай қолдау көрсетіп келгенін де мәлімдеді.