Қырғызстан мигранттардың туыстарына тегін медициналық көмек көрсетуден бас тартқан Ресейді сотқа берді

Қырғызстан Ресей Федерациясына қарсы Еуразиялық экономикалық одақ (ЕАЭО) сотына талап-арыз түсірді. Бұған Ресей билігінің еңбек мигранттарының отбасы мүшелеріне тегін медициналық көмек көрсетуден бас тартуы себеп болған. Бұл одақ аясындағы келісімдерде тікелей қарастырылған, деп хабарлайды Orda.kz. 

Бұл туралы 27 қаңтарда Қырғыз Республикасының міндетті медициналық сақтандыру қорының басшысы Азамат Мұқанов Жогорку Кенештің еңбек және әлеуметтік мәселелер жөніндегі комитеті отырысында мәлімдеді.

Оның айтуынша, міндетті медициналық сақтандыру (ММС) полистері тек еңбек мигранттарының өзіне ғана емес, олармен бірге Ресейде тұратын отбасы мүшелеріне де берілуі тиіс. Бұл талап ЕАЭО-ға мүше барлық бес ел қол қойған келісімде бекітілген. Алайда Қырғызстанның мәлімдеуінше, Ресей бұл нормаларды орындамаған. 

Әңгіме 2014 жылы қол қойылған ЕАЭО туралы шарттың 96–98-баптары жайлы. Құжатқа сәйкес, одақ елдері еңбек мигранттары мен олардың отбасыларына әлеуметтік қорғау мен медициналық көмекке, соның ішінде міндетті медициналық сақтандыруға тең қолжетімділікті қамтамасыз етуге міндетті.

Ресми түрде ЕАЭО елдерінің азаматтары Ресейде 2017 жылдан бастап тегін медициналық көмек алу құқығына ие болған. Ол үшін жұмыс берушімен жасалған еңбек немесе азаматтық-құқықтық шарт жеткілікті. Егер мұндай келісім болмаса, ерікті медициналық сақтандыру полисін сатып алу қажет.

Алайда іс жүзінде тегін медициналық көмек көбіне тек шұғыл жағдайлармен шектеліп, толыққанды ем алу үшін мигранттарға өз қалтасынан төлеу ұсынылған. 

Жағдай 2025 жылдың күзінде күрделене түсті. Ресейде ережелер өзгеріп, 28 қарашадан бастап міндетті медициналық сақтандыру арқылы тегін ем алу құқығы тек кемінде бес жыл заңды жұмыс істеген мигранттарға ғана берілетін болды. Бішкек бұл шешім ЕАЭО ішіндегі келісімдерге тікелей қайшы деп есептейді.

Талап-арыз беруге нақты қай жағдай түрткі болғаны нақтыланбады. Белгілісі — іс қазірдің өзінде қаралуда, ал сот шешімі алдағы екі апта ішінде шығуы мүмкін.

Айта кетейік, Щучинск қаласындағы әскери колледжде қызылша ауруы өршіді.