Қырғызстан мен Тәжікстан тарихи келісімге қол қойды

Қырғызстан мен Тәжікстан мемлекеттік шекара туралы тарихи келісімге қол қойды. Соңғы келіссөздер Бішкекте өтті, деп хабарлайды Orda.kz.

«Ала-Арша» мемлекеттік резиденциясында қырғыз-тәжік шекарасын делимитациялау бойынша үкіметтік делегациялар арасындағы келіссөздер өтті. Тәжікстан делегациясын Ұлттық қауіпсіздік мемлекеттік комитетінің басшысы Саймумин Ятимов басқарды.

Қырғызстан Министрлер кабинеті басшысының орынбасары Камчыбек Ташиев екі ел халқы үшін ерекше тарихи күн туғанын айтты.

«Біз қырғыз-тәжік шекарасын делимитациялау туралы қорытынды хаттамаға қол қойдық», - деді ол.

Ташиевтің айтуынша, мемлекеттік шекара туралы келісім, үкіметтер арасындағы энергетикалық нысандар мен су ресурстары туралы келісім, жол айрығын пайдалану және жаңа жолдар салу туралы келісім сияқты бірқатар құжаттар дайындалды.

Құжат екі ел президентінің қол қоюына дайындалды. Бұған дейін Қырғызстан мен Тәжікстан шекаралық аймақтарды айырбастауға келіскен болатын. 2023 жылдың желтоқсанында Қырғызстан мен Тәжікстанның мемлекеттік шекара сызығының 90 пайыздан астамын нақтылағаны хабарланды.

БАҚ мәліметінше, қырғыз-тәжік шекарасының ұзындығы 972 шақырым. Шекараның нақты анықталмағандығынан шекаралық аймақтарда мезгіл-мезгіл қақтығыс туындайды.