Қырғызстан Киров су қоймасынан Қазақстанға су беруді қалпына келтірді

Тамыз айында Қырғызстан су қорының таусылуына байланысты су беруді тоқтатқан болатын

Қырғызстан Қазақстанның оңтүстік облыстарын сумен қамтамасыз ететін Киров су қоймасына жол ашты, деп хабарлады су шаруашылығы және ирригация министрі Нұржан Нұржігітов.

Нұржігітовтың айтуынша, Қазақстан мен Қырғызстанның соңғы үкіметаралық кеңесінде тараптар Киров су қоймасынан Жамбыл облысына су беруді қалпына келтіру туралы шешімге келген.

«Біз Қырғыз Республикасының Ауыл шаруашылығы министрлігі мен Су ресурстары қызметінің басшыларымен кездесіп, Киров су қоймасын ашудың ағымдағы шарттарын жаңартуға келістік», - деді министр.

Қазір Жамбыл облысындағы су қоймаларына су жіберілуде.

Қазақстанға кіретін су көзі жабылған кезде су қоймасында қажетті мөлшердегі су жиналды, енді оны ел қабылдайтын болады, деді Нұржігітов.

Естеріңізге сала кетейік, Қырғызстан 2023 жылдың 10 тамызында Қазақстанның оңтүстігіне су беруді тоқтатқан болатын.