Қырғызстан халқы ту ауыстыруға қарсы

Бішкектегі М.Горький атындағы саябақта жиналған жұрт  елдің туын өзгерту туралы ұсынысқа наразылық білдірді, деп хабарлайды Kaktus media.

Шерушілер өздерімен бірге қызыл және сары жалаушалар ала келген. Жиналғандар Қырғызстанның әнұранын шырқады.

Басылымның жазуынша, саябақта 100-ге жуық адам болған, бірақ жарияланым кезінде адамдар үсті-үстіне келіп жатты.

Сондай-ақ, акцияны ұйымдастырушылардың бірі Афтанділ Жоробековтің ұсталғаны белгілі болды.

Қырғызстанның туын өзгерту туралы ұсынысты Парламент спикері Нұрланбек Шәкиев пен депутат Улан Пірімов жасаған болатын.

Әтір Әбдірахматова Афтанділдің ешқандай тәртіпсіздікке шақырмағанын, тек өз пікірін білдіргісі келгенін мәлімдеді. Шенеуніктер ту ауыстыру бастамасын белсенді түрде қолдаса, халықтың наразылығы, керісінше, күшейе түскен. Дегенмен, мемлекеттік рәмізді өзгертуге қарсы шерулерге тыйым салынып, белсенділер ұсталды.

Ал, Жогорку Кенештің тиісті комитеті туды өзгерту туралы заң шығару бастамасын бірауыздан қолдады. Осыдан кейін заң жобасы парламент пен министрлер кабинетінің бірінші оқылымында қабылданды.