Қырғызстан әуежайында тағы бір журналист ұсталды

Қырғызстан ІІМ-нің баспасөз қызметі тәуелсіз журналист Әли Ергешов ұсталғанын растады, деп хабарлайды Orda.kz порталы.

Полиция оны ақпан айының 13-ші жұлдызында, Манас әуежайында бет-жүзін анықтайтын камералар арқылы ұстаған.

Полицияның айтуынша, Ергешовті ұстауға Жалалабад қалалық соты санкция берген. Іс 2023 жылы мамырда бұзақылық фактісі бойынша қозғалған қылмыстық іспен байланысты.

Бұған дейін Ерегешов өзінің Instagram парақшасына өзін құқық қорғау органдары ұстағаны жайлы бейнеролик пен фото жариялаған. Ол өзі ешқандай заң бұзбағанын айтып, істі кәсіби қызметімен байланыстырған.

Әли Ергешов – YouTube-тағы «Ел білсін» жобасының авторы. Ол қоғамдық тамақтану орындарындағы санитарлық жағдай және мемлекеттік мекемелердегі халыққа қызмет көрсету сапасы, сонымен бірге азаматтардың түрлі заңсыздықтары туралы бейнеролик жариялайды. Оның 130 мың көрермені бар.

Ақпан айында Қырғызстанда блогер Батмакан Жолболдуева және журналист Ермек Аттокуров бопсалау бабы бойынша күдікке ілініп, ұсталғаны белгілі болған. Кейін Аттокуров үйқамаққа жіберілді. Қаңтар айында Қырғызстанда "Темиров LIVE" жобасының 11 бұрынғы және қазіргі қызметкері ұсталған. Құқық қорғаушылар елдегі сөз бостандығы ахуалына алаңдап отыр.