«Қылмыс әлемінің серкелері қысым көрсетті»: Маңғыстаудағы теміржолшылар мәлімдеме жасады

Бейнеу станциясының жұмысшылары еңбек жағдайының нашарлығына және арнайы киімдерінің сапасыздығына наразылық білдіріп, шағым түсірген. Алайда олардың айтуынша, «Қазақ темір жолы» жауап берудің орнына қорқытып, қысым көрсеткен, деп хабарлайды Orda.kz.

Маңғыстау облысындағы Бейнеу жол дистанциясының қызметкерлері бейнеүндеу жазып, еңбек құқығы бұзылғанын және бұл туралы айтқаннан кейін өздеріне қоқан-лоқы жасалғанын мәлімдеді. Бұл жөнінде «Бәсе» басылымы жазды.

Жұмысшылардың айтуынша, еңбек жағдайы мен арнайы киім мәселесі талқыланған жиналысқа кәсіподақ төрағасы мен дистанциясының  басшысы олар «қылмыс әлемімен байланысы бар» деп сипаттаған адамдарды ертіп келген. Кездесуден кейін бұл адамдар теміржолшыларға ашық қысым көрсетіп, «қоймасаңдар, жазалаймыз» деп қорқытқан.

Сондай-ақ, теміржолшылар «ҚТЖ» магистралды желісі Маңғыстау бөлімшесінің директоры Ерназар Ізтұрғанов пен оған қатысты барлық басшыларды қызметінен босатуды талап етті. Олардың пікірінше, қысым жоғары жақтың тапсырмасымен ұйымдастырылған.

Жұмысшылар мұндай жағдайдың өңірде бұрыннан бар екенін айтады. Бұған дейін де еңбекке қатысты наразылық туған кезде «қылмыс әлемінің серкелері» араласып ереуілдер басып-жаншылған. Маңғыстаудағы жұмысшылар арасында бейресми «бақылаушы» ретінде белгілі Әлібек Нарбеков (лақап аты – Алиба) туралы жиі айтылады. Оның бұған дейін ұйымдасқан қылмыстық топқа қатысқаны, рейдерлік және бұзақылық үшін сотталғаны белгілі. Теміржолшылардың сөзінше, ол өңірге келгеннен кейін кез келген наразылықты басып отырған.

Ал «Қазақстан темір жолы» компаниясы бұл жағдайды «ішкі түсініспеушілік» деп сипаттап, өңірге арнайы жұмыс тобын жіберетінін хабарлады. Компания ішкі тексеріс қорытындысы бойынша шешім қабылданатынын және бәрі еңбек заңнамасы аясында жүргізілетінін мәлімдеді:

«Бар мәліметтерге сәйкес, бұл жағдай жеке қызметкерлер мен өңірлік басшылық арасындағы түсініспеушілікке байланысты туындаған ішкі мәселе. Компания басшылығы жағдайды бақылауда ұстап отыр»,  деп жазылған ҚТЖ-ның ресми хабарламасында.

Алайда теміржолшылар мұнымен келіспейді. Олар мұны «түсініспеушілік» емес, қарапайым еңбекшілердің қауіпсіздік пен лайықты еңбек жағдайын талап еткеніне қарсы жасалған қысым деп есептейді.