«Құтқарыңдаршы»: Қытайда ұсталған қазақстандықтың ісі үшін адвокаттар 7 млн талап етті

Қытайда Қазақстан азаматы ұсталды. Оның туған-туыстары қазір биліктен көмек сұрап отыр, деп хабарлайды Orda.kz. 

Tizgin.kz порталының мәліметінше, Бүркіт Аман атты азамат 9 қазан күні Алматыдан Чжэнчжоу провинциясына ұшып барған. Араға екі күн салып ол хабарсыз кеткен екен. Әпкесінің айтуынша, бауыры анасына хабарласып: «мама, мені құтқарыңдаршы, маған жала жауып ұстады» деп айтқаннан соң байланыс үзілген.

Сонымен қатар, туысының айтуынша, адвокаттар Бүркіттің ісін қарау үшін 7 млн теңге сұраған. Анасы қорыққаннан 1 млн теңгені дереу шоттарына аударып жіберген.

«Достары екі күн бойы Бүркіттің қамалғанын айтпады. Тек кеше кешке ғана хабарлады. Күндіз өзі телефон шалғанда не үшін ұсталғанын айтқан жоқ. Достары жай төбелес, қылмыстық іс қозғалды, көмектесе алмаймыз деп елге қайтып кеткен», — дейді туысы.

Туыстары Қазақстанның сыртқы істер министрлігіне арыз тапсырған. Министрлік өкілдері «күту керек» деп қысқа жауап қайырған.

Еске сала кетсек, бұған дейін Қытайда туып, Қазақстанға көшіп келіп, азаматтық алған Әлімнұр Тұрғамбай да 23 шілде күні жұмыс бабымен Шыңжаңға кеткен. еді. Қасында болған адамдар әйеліне «Қытай шекарасынан оны полиция ұстап әкетті» деп айтқан. Қытай билігі Әлімнұр Тұрғанбайды ұстағанын растады.