Құтқарушылар радардан жоғалып кеткен тікұшақтың сынықтарын тапты

Алматы облысындағы Сорбұлақ көлі аумағында ғарыштық мониторинг арқылы мұнай тәрізді дақ анықталды, деп хабарлайды Orda.kz ҚР Төтенше жағдайлар министрлігіне сілтеме жасап.

Аталған аумақты тексеру барысында құтқарушылар әуе кемесінің сынықтарын тапты. Әзірге ресми түрде расталмаған мәліметтерге сәйкес, бұл Отар елді мекені маңында байланыс үзілген тікұшаққа тиесілі болуы мүмкін.

Қазіргі уақытта іздестіру-құтқару жұмыстары жалғасып жатыр. Оған арнайы техника: эхолоттар, ұшқышсыз ұшу аппараттары (дрондар) және суасты дрондары қолданылуда.

Бұған дейін ҚР Қорғаныс министрлігінің Әуе күштері Алматы облысында тікұшақтың радардан жоғалып кеткенін хабарлаған болатын. Бортта үш экипаж мүшесі болған.

Айта кетейік, кеше Ресейде Ан-24 ұшағы апатқа ұшырап, соның салдарынан 49 адам қаза тапты.