Құрылысы әлі бітпеген LRT-ға жұмысшылар іздестірілуде

Астанада LRT жүйесінің автоматтандырылған құрамдарына операторлар қабылданып жатыр, деп хабарлайды Orda.kz.

City Transportation Systems компаниясы жеңіл рельсті көлік желісінде жұмыс істеу үшін поезд операторлары жұмысы бойынша бос орындарға байқау жариялады. Таңдалған кандидаттар Астанада және Қытайда оқудан өтеді. Компания қызметкерлерді оқыту мен біліктілігін арттыру жұмыс беруші есебінен қамтамасыз етілетінін айтқан.

Компания мәліметінше, LRT құрамдары толық автоматтандырылған және пилотсыз жұмыс істейді. Жарияланған бос орын байқауында талаптар да көрсетілген.

Атап айтқанда, оператор міндеттеріне жолаушылар қауіпсіздігін және поездың техникалық жағдайын бақылау, қауіпсіздік стандарттарының сақталуын қамтамасыз ету, автоматтандырылған басқару жүйесі жұмысын үздіксіз бақылау және ақауларды анықтап, жою міндеттері кіреді.

Сондай-ақ, желдету жүйесін бақылау, жолаушылардың мінуі мен түсу тәртібін сақтау, қозғалмалы құрамның үздіксіз жұмысын қамтамасыз ету міндеттері көрсетілген.