Құлыбаев сотта жеңілді, енді ҚазҰУ жерлері қайтарыла ма?

Назарбаевтың миллиардер күйеу баласының бақылауындағы «Atlas Development» және «Omirex» компаниялары әл-Фараби атындағы ҚазҰУ-дың бизнеске өткен жер учаскелері бойынша өткен сотта жеңілді, деп хабарлайды Orda.kz порталы.

«Алматы қаласы, әл-Фараби даңғылының солтүстігінде, Есентай өзенінің батысында, жерасты автотұрағы бар көпқабатты бизнес орталығын салу мақсатындағы кадастрлық жер учаскесін «OMIREX» ЖШС мен «ATLAS DEVELOPMENT» ЖШС арасында жасалған 2017 жылғы 9 қарашадағы №9338 сатып алу-сату шарты жарамсыз деп танылсын» делінген Алматы қаласы мамандандырылған ауданаралық экономикалық сотының қаулысында.

Әкімдіктің шешімдері мен аталған мәмілелер 2024 жылғы 9 сәуірде сот шешімі бойынша жарамсыз деп танылды.

«Kompra» компаниясының мәліметінше, Atlas Development-тың құрылтайшылары «Кипрос» ЖШС және «Joint Technologies» ЖШС. Соңғы компания Шынар Елимисовамен бірге Omirex-тің негізін қалаушы.

«Kipros» компаниясының негізгі иесі Құлыбаев, сол компания арқылы Назарбаевтың күйеу баласы Joint Technologies компаниясын басқарады» деп жазады ҚазТАГ.