Құлсарыда төтенше жағдайлар қызметінің жас қызметкері қайтыс болды

Атырау облысы Жылыой ауданы Құлсары қаласында Төтенше жағдайлар бөлімінің 23 жастағы қызметкері жедел-құтқару жұмыстары кезінде қаза тапты, деп хабарлайды Orda.kz тілшісі.

Алдын ала мәлімет бойынша, оны суды сору кезінде ток соққан.

«Ер адам азаматтық қорғау органдарында 2021 жылдан бері жұмыс істейді. Осы уақыт ішінде ол ірі өрттерді сөндіруге, адамдардың өмірі мен мүлкін сақтап қалуға атсалысты» деп хабарлады Атырау облысы бойынша Төтенше жағдайлар департаментінің баспасөз қызметі. 

Қайтыс болған қызметкердің артында жұбайы мен ата-анасы қалды «Төтенше жағдайлар министрлігі Бейбарыс Жалғасбайұлының отбасы мен жақындарына қайғыларына ортақтасып көңіл айтады.

«Ол өз ісінің кәсіби маманы ретінде жақсы естелікпен біздің жүрегімізде мәңгі сақталады. Төтенше жағдайлар министрлігі қаза тапқан өрт сөндірушінің отбасына жан-жақты көмек пен қолдау көрсетеді» делінген ведомство хабарламасында.

Ауданда су сору жұмыстары әлі де жалғасып жатыр.