Құлсарыда автобус бағанаға соғылып, алты адам зардап шекті

12 маусымда Атырау облысында орналасқан Құлсары қаласында қоғамдық көлік жол апатына ұшырады. Апаттан алты адам жарақат алып, ауруханаға жеткізілді, деп хабарлайды Orda.kz  тілшісі.

Полиция мәліметіне сәйкес, автобус жүргізушісі көлікті басқара алмай көше шамдары мен жылдамдықты бақылайтын «Арқан» камерасын ұстап тұрған бағанаға соғылған. Соқтығыс кезінде автобус салонында жолаушылар болды.

«Жол-көлік оқиғасы салдарынан әр түрлі дене жарақаттарын алған алты жолаушы Жылыой аудандық орталық ауруханасына жеткізіліп, оларға қажет ем көрсетілді. Апатқа қатысты тиісті сызбалар жасалып, құжат жиналды»,  деген мәлімет берді Атырау облыстық полиция департаменті.

1974 жылы туған автобус жүргізушісіне қатысты ӘҚБтК-нің 610-бабындағы әкімшілік хаттама толтырылды.

Дәрігерлердің айтуынша, зардап шеккендердің жай-күйі тұрақты, өмірлеріне қауіп жоқ. Бәрі ауруханадан шықты.