Құлсары тұрғыны жылыойлықтарға блогерлерге сенбеуді сұрады

Құлсары тұрғыны жылыойлықтарға блогерлерге сенбеу керек екенін мәлімдеді, деп хабарлайды Orda.kz порталы.

«Жылыойға неше түрлі блогерлер келіп, хайп жинап жүр екен. Құрметті Қазақстанның блогерлері! Сіздер келетін болсаңыздар, қолға күрек ұстап көмекке келіңдер! Бұл жерге келіп, хайп қуып, өздеріңізге контент жасағандарың бізге қажет емес! Содан кейін ешқандай іріткі салмаңыздар. Үкіметті, халықты жамандап, біреулерді жамандап қажет емес. Біз қазір Үкіметпен бірігіп, барлығымыз бірауыздан жұмыс істеп жатырмыз. Әкімдікте жұмыс істейтін адамдар – өзіміз сияқты үйі суға кетіп қалған адамдар. Ортақ штаб құрып, жұмыс істеп жатқан жайымыз бар. Ешқандай іріткі салмаңыздар!» - дейді ол. 

Видеоға түскен әйел жылыойлықтарға жүгініп, блогерлерге сенбеуге шақырады.

«Жан-жақтан келіп жатыр. Ешкімнің арандатуына сенбеңіздер. Бұл жерде бізді ауызбіршілік қана алып шығады. Бүкіл Жылыой болып бір-бірімізді қолдауымыз керек. Сол кезде осы қиындықтан өтеміз», - дейді ол.

Ол жазбасында Ерболат, Ырысбала, Ерғазы, Кокожамбо сияқты блогерлерге алғыс айтады. Алайда  басқа арандатушы блогерлер барын ескертеді.