Құлдықта жүрген қазақ қыздары құтқарылды

Таиландта екі қазақстандық қыз құлдықтан құтқарылды. Бұл туралы ҚР Сыртқы істер министрлігінің ресми өкілі Айбек Смадияров мәлімдеді, деп хабарлайды Orda.kz порталы.

Астанада өткен брифингте ол істің мән-жайын баяндады. Анықталғандай, қыздар жасырын байланыс орталығындағы бос жұмыс орнына алданып қалған. Олар бірнеше тіл білетіндіктен жұмысқа алмақ болған-мыс. Бірақ барғанда қыздарды құлдыққа салған. 10 мың доллар талап еткен.

«Осы жылы қаңтардың соңында Таиландтағы консулдықтың WhatsApp нөміріне хабарлама келді. Онда "Мен Қазақстан азаматымын. Қай мемлекет екенін білмеймін, джунглидің ішінде құлдыққа түсіп қалдым, көмектесіңіздер" деп жазылған. Дереу анықтай бастадық. Сөйтсек біздің екі азаматшамыз құлдыққа түсіп қалған. Ең қызығы екеуінің де жоғары білімі бар, бірнеше тіл біледі. Интернеттен хабарлама көріп, алданып қалған. Әр адам басына 10 мың доллардан ақша сұраған. Жергілікті билікпен жұмыс істеп, бір айда екеуі құтқарылды. Қазіргі таңда олар елге келе жатыр", - дейді СІМ өкілі Айбек Смадияров. 

Оның айтуынша қыздарды бір тиын бермей құтқарып алған.