Құлдықта болған Мұқан ісі: Полиция жауап берді

Азия чемпионатының жүлдегерінің отбасысында құлдықта болдым деп жариялаған Мұқан Негматовтың ісі бойынша Солтүстік Қазақстан облысының полиция департаменті Orda.kz редакциясының сауалына жауап берді.

Мұқан есімді 23 жасар жігіт еркін күрестен Азия чемпионатының күміс жүлдегері Айша Уәлишан мен оның күйеуі Әлфарабидің оны 10 айдан астам уақыт бойы еркінен тыс құлдықта ұстағанын және қорқытып келгенін айтты.

Полиция департаментінің мәліметінше, аталған факті бойынша қылмыстық іс қозғалды.

«Істің барлық мән-жайын анықтау үшін жан-жақты тергеу амалдары жүргізілуде. Адам құқықтарының бұзылуына және қанаудың кез келген түріне мүлдем төзбеушілік танытылады. Барлық дәлелдер мен мәлімдемелер қолданыстағы заңнамаға сәйкес мұқият тексеріледі», – деп мәлімдеді полиция департаментінің баспасөз қызметі.