Күдебаев Қазақстаннан Бішкек арқылы шығып, Түркияға кеткен - БАҚ

Серік Күдебаевтың елден қашып кетуіне қатысты кейбір мәліметтермен Ulysmedia.kz бөлісті.

Серік Күдебаев – қаңтар оқиғасы бойынша сотталып жатқан Алматы және Жетісу полиция департаменттерінің бұрынғы басшысы. Кейбір БАҚ экс-шенеуніктің сот үкімі шықпай тұрып Қазақстаннан кетіп қалғанын мәлімдеді.

Ulysmedia.kz ақпарат агенттігінің хабарлауынша, бұрынғы жоғары шенді полицей 23-24 наурыз күндері елден қашып кеткен. Ол Қырғызстан шекарасын заңсыз кесіп өтіп, Бішкекке келіп, одан кейін Түркияға жол тартқан.

Еске салсақ, Күдебаев «ауыр зардаптарға әкеп соққан қызметтегі әрекетсіздік» үшін айыпталған. Тергеушілердің мәліметінше, қаңтар оқиғасы кезінде Күдебаев Алматы облысының коменданты бола тұрып, полиция департаменті ғимаратынан шығып кеткен. Іспен арнайы прокурор айналысып жатыр.

Бұған дейін мемлекеттік айыптаушы Күдебаевты 9 жылға бас бостандығынан айыруды сұраған болатын.