Қуандық Бишімбаев екі айға қамауға алынды

Бұрынғы ҚР Ұлттық экономика министрі Қуандық Бишімбаев екі айға қамауға алынды, деп хабарлайды Orda.kz Астана қаласының мамандандырылған ауданаралық тергеу сотының баспасөз қызметіне сілтеме жасап.

Бишімбаев 9 қарашада әйелі Салтанат Нүкенованы өлтірді деген күдікпен ұсталып, екі күннен кейін бұлтартпау шарасы таңдалды.

«Астана қаласының мамандандырылған ауданаралық тергеу соты күдікті Бишімбаев Қ.-ға қатысты екі ай мерзімге қамауға алу түріндегі бұлтартпау шарасын тағайындады» делінген хабарламада.

Еске сала кетейік, оқиға BAU мейрамханасында болған. Полицияның хабарлауынша, Астана қалалық полиция департаментіне келушілер арасында жанжал туындап, салдарынан әйел алған жарақаттан қайтыс болғаны туралы хабарлама түскен.

Салтанат Нүкеновамен қоштасу рәсімі Павлодар қаласындағы Мәшһүр Жүсіп атындағы мешітте өтті. Кейін марқұмның туыстары бұл іс «жылы жабылып» қала ма деген күдіктерін білдірді.