ҚР ҰҚК: Қорғаныс министрлігінің экс-басшысы Жақсылықовқа қатысты тергеу жүргізіліп жатқан жоқ

Ұлттық қауіпсіздік комитеті бұрынғы Қорғаныс министрі Руслан Жақсылықовқа қатысты тергеу жүргізіп жатқан жоқ, деп хабарлайды Orda.kz ведомствоның редакция сауалына берген жауабын негізге алып.

Жақсылықовтың атына қатысты ақпараттық дүрбелең 14 маусым таңертең пайда болды. Бірқатар БАҚ өз дереккөздеріне сілтеме жасап, оның ұсталғаны туралы хабар таратты. Еске салайық, генерал қызметінен 8 маусымда президент Қасым-Жомарт Тоқаевтың жарлығымен босатылған болатын. Алайда көп ұзамай Руслан Жақсылықов журналистерге байланысқа шығып, үйінде екенін және ешкімнің оны ұстамағанын мәлімдеді.

Orda.kz дереккөздерінің мәліметінше, экс-министрдің ұсталғаны туралы ақпараттың пайда болуына Қорғаныс министрлігіндегі тергеу әрекеттері себеп болуы мүмкін. Бұл оқиғалар (Жақсылықовтың отставкасы да) Қазақстан армиясының әскери бюджетінің едәуір ұлғайып, қайта қарулануы аясында болып отыр.

Руслан Жақсылықов қызметінен босатылардың алдында Қазақстан мен Ұлыбритания арасындағы әскери ынтымақтастық жоспарына қол қойылғаны туралы хабар тараған еді. Екі күннен кейін Қорғаныс министрі отставкаға кетті. 

Бұған дейін біз Руслан Жақсылықовтың жұбайы өзінің әніне түсірген  бейнебаянына әскери қызметшілер мен әскери техниканың қатыстырылғаны туралы жазған едік. Қорғаныс министрлігі бұл Ұлттық ұлан әскерлерінің имидждік бейнебаяны болғанын мәлімдеген.