ҚР СІМ Үндістан мен Пәкістан қатынасын одан әрі шиеленістірмеу үшін, ұстамдылыққа шақырды

Қазақстанның Сыртқы істер министрлігі Үндістан Республикасы мен Пәкістан Ислам Республикасы арасындағы жағдайдың шиеленісуіне байланысты мәлімдеме жасады, деп хабарлайды министрліктің баспасөз қызметі. 

Ведомство болып жатқан оқиғаларға алаңдаушылық білдіріп, жағдайдың одан әрі нашарлауына жол бермеудің маңыздылығын атап өтті.

«Қазақстан Республикасы Сыртқы істер министрлігі Үндістан Республикасы мен Пәкістан Ислам Республикасы арасындағы жағдайдың шиеленісуіне байланысты қатты алаңдаушылық білдіреді. Барлық  тарапты жағдайдың одан әрі шиеленісуіне жол бермеу үшін барынша ұстамдылық танытуға шақырамыз» деп жазылған хабарламада.

СІМ Қазақстан халықаралық құқық пен БҰҰ Жарғысы қағидаттарына сәйкес халықаралық және өңірлік келіспеушіліктерді шешу қажеттігін дәйекті түрде қолдайтынын атап өтті.