ҚР ІІМ: Бір шапалаққа бола балаңызды тартып алмайды

ҚР ІІМ орынбасары Игорь Лепёха балаға қатігездік көрсетіліп, әлеуметтік қорғауға мұқтаж болған жағдайда ғана отбасынан алынатынын айтты, деп хабарлайды Orda.kz.

Игорь Лепёханың айтуынша, балаларына бір шапалақ салғаны  үшін жанұясынан тартып алып балалар үйіне жібереді деп алаңдаудың қажеті жоқ.

«Әлеуметтік кодекстің 133-бабында балалардың арнайы әлеуметтік қызметтерге мұқтаждығын анықтайтын себептер тікелей көрсетілген. Олар — жетімдік, ата-ананың қамқорлығынсыз қалу, қараусыз қалу және басқа да санаттар. Бұл бапта қатыгездік, әлеуметтік бейімделудің бұзылуы мен психикалық себептер де бар. Сонымен қатар, қатыгездікті бағалаудың критерийлері бекітілген бұйрық дайындалды. Мұнда баланы қатыгездікке ұшыраған деп тану үшін барлық параметрлер нақты көрсетілген», — деп түсіндірді ІІМ орынбасары.

Сонымен қатар, осы нұсқалар бойынша баланы кәсіби түрде қабылдайтын отбасыларға беру мүмкіндігі де пайда болды.

Айта кетейік, осыдан біраз уақыт бұрын «Қазақстан ата-аналар одағы» отбасыдан балаларды тартып алады деген көп ата-ананың алаңдаушылығы туралы айтқан болатын. Сол сәтте, тұрмыстық зорлық-зомбылық туралы заңға қарсы петиция пайда болды.