«Көзі жабылмай, жасы тыйылмай қалған»: Сәтсіз блефаропластикаға қатысты үкім шықты

Ақтөбе қаласының соты сәтсіз блефаропластика үшін фельдшерге қарсы шағым түсірген азаматшаның ісін қарауды аяқтады, деп хабарлады Orda.kz.

2023 жылғы 4 тамызда Instagram әлеуметтік желісіндегі жарнамаға қызыққан әйел жауапкердің пәтерде өткізген операциясына жүгінді. Бірақ әйелдің ота жасаған қабағы асқынып кетті.

Бірінші отадан кейін көздердің ассиметриясы байқалды. Сондықтан қайтадан ота жасатуға тура келді. Алайда екінші отадан соң әйелдің қабақ тұсы тіпті асқынып кетті. Көз терісін тым терең кесіп, төменгі кірпіктерді жарақаттаған соң қан аққан. Қан тоқтатылып, жара жабылғанымен, салдары ауыр болды.

Әйел офтальмологтарға және пластикалық хирургтерге жүгінуге мәжбүр болды. Конъюнктивит, ауырсыну және үнемі көз жасы ағуынан зардап шекті. Көздері толық жабылмай, бет-әлпеті үнемі ісініп, түрі өзгерді. Жұмысынан кетуге мәжбүр болды және емделу мен қалпына келтіру үшін қосымша шығынға ұшырады.

Сот жауапкердің пластикалық операцияларды жүргізуге лицензиясы емес, тек сертификаты бар фельдшер екенін анықтады. Сот шешімі бойынша жауапкер азаматшаға 235 мың теңге материалдық шығын және 1 миллион теңге моральдық зиян ретінде өтемақы төлеуге міндеттеді. Сот шешімі заңды күшіне енді.