Костромада Ұлттық ұлан сарбазы баланы ажалдан құтқарды

Ресейдің Кострома қаласында жүрген ұлттық ұлан терезеден құлауға шақ тұрған баланы ажалдан арашалап қалды.

Бұл туралы ІІМ хабарлады.

8 маусым күні кешкісін Жандос Нұрахметов Галичская көшесінің бойында баласымен серуендеп келе жатқан. №51 үйдің қасынан өткенде екінші қабаттың терезесінде тұрған 4-5 жасар баланы байқап қалады. Баланың ашық тұрған терезеден ойыншықтарды, киім-кешектерді, сөмкелерді лақтырып жатқанын көреді.

«Мен өтіп бара жатқан тұрғындардан бала мен оның ата-анасы туралы сұрай бастадым. Сосын бала ішке кіріп кетуі үшін онымен әңгімелесіп көрдім. Бірақ бала сөзімді елемеді. Сәлден соң көшедегі бір әйел бұл баланың цеберальді ауруы бар екенін айтты. Осы кезде бала терезенің сыртқы басқышына шықпақ болып, құлап кете жаздады. Мен дереу әке-шешесі естісін деп айқайлай бастадым да, құбыр арқылы екінші қабатқа көтерілдім. Баланы құтқарып пәтерге кіргенімде үйде ешкім жоқ екенін көрдім. Сосын баланы алып шығып, әке-шешесін танитын басқа тұрғындарға аманаттап кеттім», — деді Қазақстан Ұлттық ұланының офицері.

Айта кетейік, подполковник Жандос Нұрахметов Ресейдің Кострома қаласындағы С.К.Тимошенко атындағы әскери академиясының студенті. Қазіргі уақытта жоғарыда аталған академияда Қазақстаннан алты курсант, екі студент және бір адъюнкт білім алуда. Подполковник Нұрахметовтың өзі 2022 жылы Қазақстан Республикасы Ұлттық ұланының 6654 (Алматы облысы Қаракемер ауылы) әскери бөліміне оқуға түсті, дәл осы айда аталған оқу орнын бітірді. Қазіргі таңда отбасынн құрған, бір жарым жасар ұлы бар.