Костенкодағы 46 кеншінің қазасы: бүгінгі сот процесі өтпейтін болды

Костенкодағы 46 кеншінің қазасына қатысты сот процесі кейінге шегерілді, деп хабарлайды Orda.kz. 

Еске салайық, жарылыс кезінде 46 кенші қаза тапқан Костенко атындағы шахтадағы трагедияны тергеу 17 ақпанда аяқталған. Кейін іс сотқа жолданды. Барлығы 74 адам зардап шекті деп танылған, онда қаза болғандардың туыстары мен зардап шеккен кеншілер бар. Қылмыстық іс 120-дан астам томды материалдарды қамтыды. Сотталушылар қатарында 10 адам бар. 

Оларға қылмыстық кодекстің 277-бабы 3-бөлігі (тау-кен жұмыстарын жүргізу кезінде қауіпсіздік ережелерін бұзу екі не одан да көп адамның өліміне әкеп соққан жағдай) бойынша айып тағылған.

Басты сот талқылауы бүгін басталуы керек еді. Алайда 13 наурыз сағат 10:00-ге шегерілді. Бұған сотталушылардың бірінің адвокатының сот отырысына келмегені себеп болды.

Қайғылы оқиға 2023 жылдың 28 қазанына қараған түні 700 метр тереңдікте болды. Метанның алғашқы жарылуы тізбекті реакцияны тудырып,  33 шахтер жарақаттан, 13-і көміртегі тотығымен уланудан қайтыс болды. Тағы 28 адам жарақат алды.