Қостанайлық диджейге қатысты сот үкімі шықты

Костанай облыстық сотының қылмыстық істер жөніндегі алқасы жергілікті James Bond барының диджейі Игорь Фоминыхқа қатысты сот үкімін шығарды, деп хабарлайды Orda.kz.

Айта кетейік, оны бұрын 2 рет кінәсіз деп таныған болатын. Оқиға 2023 жылдың мамыр айында болды. Костанайдың «Наша газета» басылымының жазуынша, жанжал барға мас болып келгендер мен бар күзетшісі Валентин Лысенко арасында туындаған. Ол ішімдікке сылқия тойып алған келушілерді барға жіберуден бас тартқан. Осыдан кейін олар сөзге келіп, арты төбелеске ұласқан. Сот нұсқасы бойынша, төбелестің бір қатысушысы, бар диджейі Игорь Фоминых Біржан Жүнісов деген ер адамды жұдырығымен ұрады. Соққыдан асфальтқа басымен құлаған ер адам қайтыс болды. Алайда, Фоминыхтың айтуынша, ол төбелес болған жерге күзетшіні қорғау үшін келген.

Бастапқыда  Қостанайда өткен 2 соттың нәтижесі бойынша  диджейге ақтау үкімі шыққан болатын. Соның бірінде  «ресми кешірім сұрау» мазмұнымен ақталды. Бірақ тамыз айында іс қайта сотқа жіберілді. Бүгін жаңадан қабылданған шешім бойынша Фоминыхтың соққысы Жүнісовті құлатып, соның салдары өлімге себеп болғаны айтылды.

«Жәбірленуші Ж. тарапынан Ф. үшін өмірі мен денсаулығына нақты қауіп болмады. Ж-ны ұру қажеттілігі жоқ еді. Осылайша, Ф.-ның төбелес барысындағы әрекеті бойынша кінәсі толық дәлелденді» делінген сот хабарламасында.

Нәтижесінде Игорь Фоминых 1,5 жылға сотталып, қауіпсіздігі аз колонияға жіберілді.