Қостанайдан Алматыға ұшқан ұшақта жолаушы қаза тапты

Ұшу кезінде жолаушы ауырып қалды. Көп ұзамай ұшақ дәрігерлер күтіп тұрған Астанаға шұғыл қонды. Алайда бұл уақытта дәрігерлер оның қайтыс болғанын жариялады.

Кеше түнде қайғылы оқиға болды. FlyArystan әуе компаниясының хабарлауынша, Қостанай-Алматы бағыты бойынша ұшып бара жатқан рейсте  жолаушылардың бірі әуеге көтерілгеннен кейін есін жоғалтқан. Стюардессалар оның тамыр соғысы мен тыныс алуын тексерді.

«Нұсқауларға сәйкес экипаж алғашқы медициналық көмек көрсетіп, борттан дәрігерді іздеуге кірісті. Содан кейін стюардессалар дәрігермен бірге дефибриллятор арқылы жүрек-өкпе реанимациясын жасады, командирдің шешімімен жолаушыға медициналық көмек көрсету үшін ұшақ Астана әуежайына шұғыл қонды» деп түсіндірді әуе компаниясы.

Жолаушыға көмек көрсету әрекеттері әуежайға жеткенше жалғасты, бірақ оны құтқару мүмкін болмады. Астана әуежайының дәрігері оның қайтыс болғанын растады.