Қостанайдағы президент резиденциясы балаларды оңалтатын орталыққа айналады

Қазақстанның солтүстігінде орналасқан бұрынғы президент резиденциясы жақын арада ерекше қажеттілігі бар балаларға арналған оңалту орталығы ретінде жұмысын бастайды, деп жазады Orda.kz.

24.kz телеарнасы хабарлағандай, жеті ғимараттан тұратын кешен балалардың ем қабылдап, тұрақты тұруына бейімделіп жатыр. Жобаны іске асыру үшін облыстық бюджеттен 352 миллион теңге бөлінген. Ал оңалтуға арналған құрал-жабдықтарды сатып алуға «Қазақстан халқына» қоры 1 миллиард теңге бағыттаған.

Орталық 2025 жылдың күзіне қарай ашылады деп жоспарланып отыр. Мұнда психоневрологиялық бұзылыстары бар және тірек-қимыл аппараты зақымданған 18 жасқа дейінгі балалар емделе алады. 60 орындық мекеме жылына шамамен 1200 балаға қызмет көрсетуге қауқарлы.

Облыстық әлеуметтік бағдарламаларды үйлестіру басқармасы басшысының орынбасары Әлия Мекебаева орталықтың ерекшелігіне тоқталды.

«Бұл орталықтың бірегейлігі неде? Біріншіден, 20 гектарлық аумақ жасыл желекке оранған. Яғни, бала ата-анасымен табиғат аясында демалып, күш-қуат жинайды. Екіншіден, қымбат, заманауи оңалту құрал-жабдықтары балалардың денсаулығын түзеуге игі септігін тигізеді деген ойдамыз», — деді ол.