Қостанайда жаттықтырушы бюджет қаражатының 5,9 млн теңгесін қалтасына басты

Қостанай облысында «Жоғарғы спорт шеберлігі мектебі» КММ балалар мен жасөспірімдер командаларының шорт-трек жаттықтырушысы бюджет қаражатын 2022 жылдан бері жымқырған деген күдікке ілінді, деп хабарлайды Orda.kz.

2022 жылдың қазанынан 2024 жылдың қаңтарына дейін жаттықтырушы шығындарды өсіріп, жалған аванстық есеп жасаған. Сонымен қатар, спорттық жиындар мен жарыстарға қатыспаған спортшыларды тізімге қосып, түскен ақшаны иемденіп отырған. Ұрланған қаражат сомасы 5,9 млн теңге болды.

«Кейіннен ұрланған ақшаны депозиттік шотқа аударып, заңды айналымға енгізіп, ай сайын 9,6% мөлшерлемемен сыйақы алып отырған», делінген хабарламада.

Пайыздық сыйақы түріндегі табыс сомасы 613,1 мың теңге.

Жемқорлықты тергеу бюросының мәліметінше, айыпталушының әрекеті ҚР ҚК 189-бабының 3-бөлігі және 218-бабының 1-бөлігі бойынша сараланады. Бұл үшін  мүлікті тәркілеу, белгілі бір лауазымдарды атқаруға 6 жылға дейін тыйым салу және 7 жылға бас бостандығынан айыру түріндегі жаза беріледі.