Қостанайда үш көше мен саябақтың атауы өзгертіледі

Көшелерге басқа атаулар беру туралы құжат облыс әкімдігінің сайтында жарияланды, деп хабарлайды Orda.kz.

Онда шешімнің халықтың пікірін ескере отырып, республикалық ономастика комиссиясының қорытындысы негізінде қабылданғаны айтылған.

«Гашек көшесінде орналасқан саябаққа - Ұлы Дала саябағының атауы берілсін. Орал көшесінің атауы Шақшақ Жәнібек батыр, Дзержинский көшесінің атауы Сағадат Нұрмағанбетов атындағы, Железнодорожная көшесінің атауы Бертран Рубинштейн көшесіне өзгертілсін»  деп хабарлайды Қостанай облысының әкімдігі. 

Атауларды өзгерту туралы шешім ресми жарияланған күнінен бастап қолданысқа енгізіледі.

Саябақ пен көшелердің атауларын өзгертуге қаржы шығыны қарастырылмағандықтан, қала үйлеріндегі тақтайшалар қандай қаражатқа ауыстырылатыны және қалай ауыстырылатыны белгісіз.

14 наурызда өткен Бурабайдағы құрылтайда Қасым-Жомарт Тоқаев ономастика саласында тәртіп орнатуды тапсырды. Президент жергілікті билік көшелер мен елді мекендердің атауларын өзгертуде, соның ішінде жерлестік және туыстық байланыстар  бойынша атау тағайындауда елеулі жолсыздықтар болғанын атап өтті.