Қостанайда виртуалды нөмірлерді сатқан алыпсатар ұсталды

40 жастағы Қостанайлық  виртуалды нөмірлерді сатқан алыпсатар ұсталды 

Қазіргі уақытта қозғалған іс шеңберінде абоненттік құрылғының сәйкестендіру кодын өзгерту үшін бағдарламаларды заңсыз құру, пайдалану, тарату фактісі тексеріліп жатыр. Бұл құқық бұзушылық үшін жарты миллион теңгеден астам ірі айыппұл немесе қырық тәулікке дейін қамауға алу көзделген. 

«40 жастағы қостанайлық simbox көмегімен абоненттік нөмірлерді қосумен айналысқан. Бұл құрылғы қаскөйлердің өздерінің қылмыстық схемаларында қолдана алатын SIM-карталарын виртуалды тіркеуге арналған. Оған бір мезетте 64 Sim-карта қоюға және оларды виртуалды нөмірлерді сататын әртүрлі интернет-сайттарда қосуға болады. Мысалы алынған бокстардың бірінен абоненттік нөмір бойынша сәйкестік анықталды. Оған алаяқтар WhatsApp-ты тіркеп, өздерін мемлекеттік қызметші ретінде таныстыра отырып, адамдарға қоңырау шалған»,– дейді Cyberpol бөлімшесінің бастығы Олжас Мағыпаров

Қостанайлық тұрғын 300-350 теңгеден Sim-карталарды көтерме бағада сатып алып, олар simbox арқылы іске қосылғаннан кейін бірнеше рет интернетте қайта сатып отырған. Ол абоненттік нөмір сататын сайттардың бірінде сатушы ретінде тіркелген. Оның осы нөмірлерді пайдалану құқығы үшін әкімшіге ақшалай сыйақы бергені анықталды. Алыпсатардан 9 құрылғы, 3 ноутбук және 1500 Sim-карта тәркіленді. Ведомстводағылар тұрғындарды өздерінің жеке банктік шоттарын, карталарын және ЖК деректемелерін үшінші тұлғаларға сатпауға шақырады. Оларды алаяқтар жеке мақсатта пайдалана алады.