Қостанайда кәсіпорын қызметкерлері жыл басынан бері жалақы алмады

Қостанайда ауылшаруашылық тәжірибе станциясының қызметкерлері осы жылдың қаңтар айынан бастап жалақы ала алмай келеді, деп хабарлайды Orda.kz.

«Заречное» ауылшаруашылық тәжірибе станциясының қызметкерлері қаңтар айынан бері жалақы алмады. Кәсіпорын қызметкерлеріне 230 миллион теңгеден астам қарыз болған. Станция қызметкерлері бұрын табысты болған кәсіпорынды әдейі банкроттыққа әкеліп жатыр деп санайды.

Заречный ауылында 20 жылдан астам бұзау баққан жергілікті тұрғын Ләззат Бисенова зейнетке шығуға үш жыл қалғанда жұмыстан кетуге мәжбүр болған. Оның айтуынша, жалақыны ғылыми қызметкерлер де, сауыншылар да алмаған.

«Жаз бойы сүт сатылды, бірақ пайда жоқ деп қалай айтуға болады? Жұмыскерлерге аздап болса да жалақы төлеуге болар еді. Соның нәтижесінде сауыншылар жұмыстан шығып, бұзаулар тек сумен суарылады, сиырлар сауылмайды. 23 миллионға сүт құбыры салынды, бірақ ол кім үшін салынды? Қаңтар айынан бері ақша берілмеді, малшылар жазда жұмыстан шығып кетті. Сиырлар жаз бойы қоршауда тұрып, салмақ жоғалтты, ал буаз сиырлар сол жерде бұзаулады, бұл қорқынышты көрініс, әрине. Мал шаруашылығын осындай күйге түсірдік! Сауыншы жоқ, сиырларды сатамыз дейді, ал бұндай арық малды кім алады?»,деп Ләззат Бисенова наразылығын білдірді.

Кәсіпорын директоры денсаулығының нашарлығына және инсульт алғанын сылтауратып, түсініктеме бермей кетті. Сонымен қатар, еңбек инспекциясы департаментінің басшысы Ерлан Темірхан «Заречное» кәсіпорны қызметкерлердің құқықтарын жүйелі түрде бұзатынын мәлімдеді.

«Кәсіпорын жалақы төлеуді үнемі кешіктіреді. Жыл сайын біз мұнда кәсіби бақылау жүргіземіз. Биыл төрт тексеру жүргізілді. Нәтижесінде қарызды өтеуге міндеттелген басшы жауапқа тартылды. Қазіргі уақытта бізде үш өтініш бар, олардың бірі — ұжымдық. Тексеру барысында барлық қажетті шаралар қабылданады. Тұрақты айыппұлдар кәсіпорынға қосымша ауыртпалық түсіреді», деп атап өтті Темірхан.

Қостанай облысының әкімдігі қызметкерлерге барлық жағынан қолдау көрсететінін айтып, келіссөздерден кейін кәсіпорын қарыздың бір бөлігін (125 миллион теңге) 25 қарашаға дейін өтеуге уәде бергенін хабарлады.

«Жыл соңына дейін жалақы бойынша қарызды жабу мүмкіндігі бар. Бұл мәселе заңнамалық және «ҰАҒБО» деңгейінде қарастырылып жатыр. Бірнеше жылдар бойы кәсіпорында кредиторлық қарыз жиналып, астық уақытында сатылмаған, оңтайландыру жүргізілмеген. Себебі кәсіпорын шағын, ал ұжымда 200 адам бар»,деп Қостанай ауданы әкімінің орынбасары Қайрат Әбішев түсіндірді.

Алайда, билік пен кәсіпорын басшылығының уәделеріне Заречный тұрғындары сенбейді. Олар болашақта жалақыдан ғана емес, жұмыс орындарынан  да айрыламыз деп қорқады.