Қостанайда дәрігерді соққыға жыққан науқасқа сот үкімі шықты

Қостанай облысында Абылайхан Саринжиповке қатысты үкім шығарылды. Ол облыстық аурухананың уролог-хирургі Антон Кистановты ұрып өлтіріп қоя жаздады, деп хабарлайды Orda.kz.

Оқиға 17 шілдеде дәрігердің қабылдауында болды. Кистановтың кабинетінің алдында ұзақ күткен Саринжипов қатты ашуланды. Дәрігердің екі шұғыл ота жүргізген соң кешігіп қалғанын түсіндіргені науқасқа ұнамады. Сол сәтте Саринжипов хирургтің басынан ұрған. Дәрігер қабырғаға соғылып, есінен танып қалды.

Қақтығыстың куәсі болған жүкті әйел дереу көмек шақырды. Дәрігерлер Кистановты жедел түрде жансақтау бөліміне жеткізді. Жарақаты ауыр болғандықтан, ол келесі күні Астанаға Ұлттық шұғыл медициналық орталығына ұшақпен жіберілді. Мұнда дәрігерлер оның өмірін сақтап қалды. Бірақ ми жарақаттарының салдары ұзақ уақыт сезіледі.

Сот материалдарына сәйкес, Кистанов әлі күнге дейін оқи алмайды. Қатты бас ауруынан зардап шегеді және хирург ретінде жұмыс істей алмайды. Ал Саринжипов дәрігердің дөрекі сөздері шабуылға себеп болды деп мәлімдеді. Алайда куәгерлер дәрігер науқасты тыныштандыруға тырысқанын растайды.

Сот бұрын қылмыстық жауапкершілікке тартылған науқасқа жарты жылға  қауіпсіздігі шектелген колонияда  бас бостандығынан айыру жазасын тағайындады.

Сонымен қатар, Саринжипов Кистановқа моральдық зиян ретінде 2 млн теңге және заңгерлік қызмет үшін 500 мың теңге төлеуге міндеттелді.