Қостанайда алты жасар қыз ашық кәріз құдығына құлап кетті

Қыздың есі дұрыс, құлаған кезде жарақат алмаған, бірақ гипотермияға байланысты реанимацияға жатқызылған.

Бұл туралы ng.kz хабарлады

Бала құлаған жылу құдығы «Аэропорт» шағын ауданында орналасқан. Оның қақпағы ашық, ішіндегі су деңгейі 70 сантиметрге дейін жеткен. Өтіп бара жатқандар шақырған төтенше жағдайлар қызметі қызметкерлері қызды люктен алып шықты.

«Баланың жағдайы тұрақты. Жағдайы жақсара түссе ертең оны бөлімшеге ауыстырамыз»,- деді облыстық балалар ауруханасының бас дәрігері Нұрлан Ержанов.

Қазіргі уақытта ашық люк паллетпен, бұтақтармен жабылып, ескерту таспасымен қоршалған.