Қостанай облысындағы ауыл тұрғындары 1 қыркүйектен бері байланыссыз және интернетсіз отыр

Қостанай облысының Надеждинка ауылында 1 қыркүйекте ұялы байланыс  аяқ астынан өшіп қалды. Станцияда ақау болды, байланыс операторы сигналды тез қалпына келтіруге уәде берді. Алайда, уәде әзірге орындалған жоқ, деп хабарлайды Orda.kz.

Жергілікті «Айна» газеті ауыл тұрғындарының күрделі мәселесі туралы жазды. Басылымның жазуынша, ауыл тұрғындары бұл жағдайға қатты наразы болып отыр - олар қымбат тариф  төлегендеріне қарамастан байланыссыз қалған. 

Ауыл тұрғындары екі аптадан астам уақыттан бері телефон соғу мен интернетті пайдалану мүмкіндігінен қағылған.

«Тұрғындар осындай ыңғайсыздықтан шаршады: бүгінде өмірдің көп бөлігі мобильді интернет пен ұялы байланысқа байланғаны белгілі, хабар-ошарсыз қалу - үлкен мәселе. Несиені төлеу де, қоңырау шалу да оңай емес. Қазірдің өзінде адамға шұғыл медициналық көмек қажет болған жағдайлар бар.
Дәрігерлерге бару және науқасты облыс орталығына апаратын көлік табу үлкен мәселеге айналды. Көп адам ақша үнемдеу үшін қалалық телефон байланысынан баяғыда бас тартқан» деп жазады басылым.

Тұрғындар интернет іздеген балалардың электр қосалқы стансасының жанына жиналатынын айтады – бұл қазір ауылдағы ұялы байланыс сигналы келіп тұрған жалғыз орын.

«Біздің мәселеміздің газет арқылы ресми түрде хабарланғанына бір апта өтті. Неге реакция жоқ? Қанша уақыт күтуіміз қажет? Мемлекеттік органдар, оның ішінде халыққа байланыс қызметтерін көрсетуді бақылайтындар қайда қарап отыр? Біздің екі тұрғын өткен аптада байланыс инспекциясына өтініш жолдады. Бірақ үнсіздік. Біздің мәселемізге ешкім мән бермейді» деп наразылықтарын білдірді тұрғындар.