Қостанай облысында отбасының берекесін қашырған үш мыңнан астам «жұдырығы жуан» бұзақы жазаланды

Қостанай облысында жыл басынан бері отбасындағы тұрмыстық зорлық-зомбылық жасағаны үшін 3,1 мыңнан астам жұдырығы жуандар  қылмыстық жауапкершілікке тартылған.

Жұдырығын ала жүгіретіндердің  жәбірленушімен қарым-қатынас жасауына тыйым салатын 6,8 мың қорғау нұсқамасы шығарылды, деп хабарлайды Orda.kz Alau TV арнасына сілтеме жасап.

Полицияның мәліметінше, нормативтік құқықтық актілерде құқық бұзушының мінез-құлқына 2,3 мыңнан астам арнайы талаптар белгіленген, оның 85,3 пайызы алкогольді ішімдіктерді пайдалануға қатысты. 2,3 мың қостанайлық қорғау нұсқаулығын орындамағаны үшін жазаланды.

Осындай істің басы-қасында жүрген кейбір полицейлер де жазаланды. Мас болып келіп, үйінде тып-тыныш ұйықтап жатқан әйелі мен оның құрбысын өлтіріп кеткен кісі өлтіру фактісі бойынша тергеу барысында бірқатар шенеуніктерге қатаң тәртіптік жаза қолданылды.

Кейін белгілі болғандай, өлтірілген әйел күйеуінің үстінен полицияға 49 рет шағымданған. Тұрмыстық зорлық-зомбылықтан өзге ол басқа да қылмыстары үшін сотталған. Сот оны 20 жылға бас бостандығынан айырды.