Қостанай облысында өрттен 5 бала қаза тапты

Қостанай облысында өрттен 5 бала қаза тапты. Анасы оларды қараусыз қалдырған, деп хабарлайды Orda.kz.

Бүгін таңғы сағат 5 - шамасында Жітіқара қаласында жеке үй отқа оранды. Құтқарушылар шақырту алғаннан кейін 7 минутта оқиға орнына келген. Алайда бұл кезде үй толықтай жалынға оранып, төбесі құлап түскен.

Өкінішке қарай, өрт кезінде үйде 6 кәмелетке толмаған бала болды. 1 жастан 7 жасқа дейінгі 5  баланың денесі үйінді астынан табылды. Ең үлкені, 2011 жылы туған бала ғана аман қалды.

Алдын ала ақпарат бойынша, балалардың анасы кештен бері танысының үйінде болып, оларды қараусыз қалдырған. Анықталғандай, балалардың әкесі жазасын өтеу мекемесінде отыр.

«Қазіргі уақытта болған жағдайдың себептері анықталуда. Өрт-техникалық сараптамасы тағайындалды. Қайғылы оқиғаға байланысты психологтар туыстарына қажетті психологиялық көмек көрсетіп жатыр. Жергілікті атқарушы органдар қажетті көмек, оның ішінде материалдық көмек те көрсететін болады»,  деп түсіндірді Қостанай облысы әкімдігі.

Қазіргі таңда, тергеу басталды, өрттің алдын ала себебі – пешті қараусыз қалдыру. Оқиға орнында облыс прокурорының бірінші орынбасары Бауыржан Бекбосынов жұмыс істеуде. Сонымен қатар, қылмыстық істің тергеу барысы Бас прокурорының бақылауына алынды.