Қостанай облысында мас жүргізуші полицейлерге оқ атты

Іс бойынша қос ұңғылы аңшы мылтығы, оқ-дәрі және алкогольдік сусындар тәркіленді.

Қару баллистикалық сараптамаға жіберілді. Сол күні құқық бұзушы күдікті деп танылып, Қарабалық полиция бөлімінің уақытша ұстау изоляторына қамалды.

Ішкі істер министрлігінің мәліметінше, 12 қарашада сағат 21:00-де Қарабалық ауданында Алматы-Екатеринбург тас жолының Приуральск кенті маңында полицейлер бүйір шамдарынсыз келе жатқан УАЗ көлігін байқаған. Полицейлерге жүргізушінің бұл әрекеті күдікті  көрінді.

«Жүргізуші полицейлердің көлікті тоқтату туралы заңды талабына жауап бермей, рөлді басқара алмай, арыққа түсіп кеткен. Ол қашып бара жатып тәртіп сақшыларына қарай атыс қаруынан бірнеше рет оқ атқан. Жүргізуші көлікті тастап, қаруды алып, оқиға орнынан қашып кеткен» деп хабарлады ІІМ.

Ауданда «Дабыл» жоспары жарияланып, жеке құрам ескертілді.

Қостанай облысының полиция департаменті арнайы жасақ қызметкерлерінің қатысуымен жедел-іздестіру іс-шаралары барысында ол досының пәтерінде мас күйінде ұсталды.

«Қазақстан Республикасы Қылмыстық кодексінің 380-1-бабы «Құқық қорғау органы қызметкерінің өміріне қол сұғу» бойынша басталған сотқа дейінгі тергеу аясында жедел-іздестіру шаралары жүргізілуде. Полиция жауап ретінде қару қолданбады, оқиғадан ешкім зардап шеккен жоқ» делінген хабарламада.

Полицейлер ұсталған азаматтың бұрын полицияның көлікті тоқтату туралы заңды талаптарын елемегені үшін әкімшілік жауапкершілікке тартылғанын атап өтті.