Қостанай облысында құрылыс компаниясынан 9 миллион теңге бопсаланған

Қаржы мониторингі агенттігі Қостанай облысында денсаулық сақтау нысандарын салу кезінде заңсыз сыйақы алу фактісі бойынша сотқа дейінгі тергеп-тексеруді бастады.

Авторлық қадағалау тобының басшысы бопсалау жолымен "ауылдағы денсаулық сақтауды жаңғырту" ұлттық жобасы шеңберінде дәрігерлік амбулаториялар салуды жүзеге асыратын компанияның бас инженерінен, орындалған жұмыс актілеріне және пайдалануға беру актілеріне кедергісіз қол қойғаны үшін тоғыз миллион теңге мөлшерінде заңсыз сыйақы алғаны анықталды.

"Тергеу әрекеттері барысында күдікті қолма-қол ақша алған кезде ұсталды. Заңсыз сыйақы мөлшері аталған объектілерді салу құнының жалпы сомасының бір пайызын құрады" деп хабарлады ведомстводан.

Сотқа дейінгі тергеу жалғасуда. Өзге де мәліметтер жария етілуге жатпайды.

"ҚР Конституциясының 77-бабы 3 – тармағының 1-тармақшасына және ҚР Қылмыстық іс жүргізу кодексінің 19-бабының 1-бөлігіне сәйкес адам қылмыстық құқық бұзушылық жасаудағы кінәсі заңды күшіне енген сот үкімі белгіленгенге дейін кінәсіз деп есептеледі" деп толықтырды ҚМА.