Қостанай облысында ет өңдеу кәсіпорны басшылығы ұйымдастырған топқа қатысты тергеу аяқталды

Қаржылық монторинг агенттігі Қостанай облысы бойынша департаменті Beef Export Group ЖШС ет өңдеу кәсіпорны басшылығы ұйымдастырған топқа қатысты қылмыстық іс бойынша сотқа дейінгі тергеуді аяқтады.

Олар ұзақ уақыт бойы "ҚР агроөнеркәсіптік кешенін дамыту" ұлттық жобасын іске асыру шеңберінде мемлекет субсидия ретінде бөлген бюджет қаражатын ұрлаумен айналысып, мемлекетке 3 млрд теңгеден астам шығын келтірген.

"Сотқа дейінгі тергеу барысында күдіктілерден 107 млн теңге өндіріліп, 3,1 млрд теңгенің мүлкіне тыйым салынды. Қылмыстық схемаға 49 адам тартылған, олардың 13-і - ұйымдасқан топ мүшесі, оларға субсидияларды жымқыру, салық төлеуден жалтару, заңсыз кәсіпкерлік қызмет, қылмыстық жолмен алынған мүлікті заңдастыру, лауазымды тұлғаларға пара беру және құжаттарды қолдан жасау бойынша айып тағылып жатыр" делінген хабарламада.

Ал ұйымдасқан топтың басшысы өзінің бақылауындағы компанияның қызметіне салықтық тексеру жүргізген мемлекеттік қызметшіге қатысты зорлық-зомбылық әрекет жасады деген күдікке ілінді.

Сондай-ақ, Қостанай, Ақтөбе, Солтүстік Қазақстан, Павлодар және Батыс Қазақстан облыстарының 30 шаруа қожалығы басшылары мен өкілдері іс бойынша күдікті деп танылды.

"Бұдан басқа, сотқа дейінгі тергеп-тексеру шеңберінде "Қостанай облысы әкімдігінің ауыл шаруашылығы басқармасы" мемлекеттік мекемесінің үш лауазымды тұлғасы ақша ұрлауға және пара алуға жәрдемдесті деген күдікке ілінді. Ветеринарлық жеті дәрігерге құжаттарды қолдан жасағаны, ақпараттық жүйеге көрінеу жалған ақпарат енгізгені, сондай-ақ заңсыз сыйақылар алғаны үшін айып тағылды" деп хабарлады Қаржылық мониторинг агенттігі. 

Қазіргі уақытта қылмыстық іс материалдарымен танысу жүріп жатыр.