Көше тазаламаған Талғар әкіміне 39 мың теңге айыппұл салынды

Алматы облысы Полиция департаментінің баспасөз қызметі азаматтардың жолдарды қар мен мұздақтан уақтылы тазартпау туралы арыздарына байланысты Талғар көше-жол желісінің жай-күйін тексеру нәтижелерін жариялады, деп хабарлайды Orda.kz.       

Тәртіп сақшыларының мәлімдемесіне сәйкес, тексеру барысында жол қозғалысы қауіпсіздігіне қатер төндіретін автожолдарды қысқы жағдайда дұрыс ұстамау фактілері анықталды.

 «Материалдарды қарау нәтижесі бойынша Талғар қаласының әкімі Арыстанбек Әбілқайырұлы мен оның орынбасары Әкімшілік құқық бұзушылық туралы кодекстің 631 бабының 1 бөлігі бойынша әкімшілік жауапкершілікке тартылып, әрқайсысына 10 АЕК мөлшерінде айыппұл салынды» деп жазылған хабарламада. 

2025 жылғы 1 қаңтардан бастап Қазақстанда айлық есептік көрсеткіш (АЕК) 3 932 теңге болды. Сәйкесінше, 10 АЕК айыппұл -  39 320 теңге.

Оған қоса жолдарды қысқы күтіп ұстауға жауапты мердігер ұйымдар ҚР ӘҚБтК-нің 631-бабының 1-1-бөлігі бойынша 30 АЕК мөлшерінде айыппұл сала отырып, шарттық міндеттемелерді орындамағаны үшін жауапкершілікке тартылғаны айтылған.

 «Қабылданған әкімшілік ықпал ету шаралары азаматтардың қауіпсіздігін қамтамасыз етуге және алдағы уақытта осындай бұзушылықтарға жол бермеуге бағытталған. Жолдарды қысқы күтіп ұстау сапасын бақылау күшейтіледі», деп хабарлады Алматы облысы ІІД баспасөз қызметі. 

Бұған дейін Алматы облысында өзенді ластаған  әкім мен жер иесі  жазаланған болатын.  Алматы облысының прокуратурасы тексеріс ұйымдастырып, өзеннің шын мәнінде қоқысқа айналғанына көз жеткізді.