«Қоршаудың арғы жағында қайыршыдай тұрды»: Астанада тылда еңбек еткен ардагерді парадқа кіргізбеді

Желіде Астанада өткен әскери парадқа баруға тырысқан кеудесінде медальдары бар қарияның бейнежазбасы қызу талқыланып жатыр, деп хабарлайды Orda.kz.

Бұл азамат — Қазақстандағы ең егде нейрохирургтердің бірі, медицина саласының еңбек сіңірген қайраткері, тыл еңбеккері Теңдік Изақов екені анықталды. Бейнежазбада астаналықтар күзетшілерден ардагерді өткізуін сұрап жатқаны естіледі. Алайда күзетшілер мұны істей алмайтындарын айтқан.

Изақовты өткізбеген қызметкерлердің әрекеті қоғамда қатты сынға ұшырады. Желі қолданушылары ыза болып, пікір жазып, ұйымдастырушылардан түсініктеме беруін талап етті. Парадқа жауапты Қорғаныс министрлігі бұл жағдайға қатысы жоқ екенін мәлімдеді. Ведомствоның айтуынша, ардагерлер тізімін олар жасамаған:

Министрлік Теңдік Изақовтың нақты Ұлы Отан соғысының ардагері емес екенін айтады. Алайда бұл өрескел қателікті ақтай алмайды. Себебі трибунада Ұлы Отан соғысына қатысқандардан бөлек, азаматтық салада еңбегі сіңген тұлғалар мен құрметті азаматтар да отырған.

Шенеуніктер тыл еңбеккерінен кешірім сұрады

Бүгін, 8 мамырда Астана қаласының жұмыспен қамту және әлеуметтік қорғау басқармасының басшысы Илья Скуб пен ішкі саясат басқармасының басшысы Нұрдәулет Әлмұханов Изақовқа барып қайтты.

Олар да, Қорғаныс министрлігі сияқты ардагерлердің трибунаға өтуі үшін алдын ала туыстарынан өтініш қабылданатынын айтып, тізім сол негізде жасалғанын түсіндірді. Изақовтың отбасы өтініш түсірмеген соң, ол тізімге енбей қалған.

Әкімдік өкілдері болған жағдай үшін кешірім сұрап, тыл еңбеккерін 9 мамыр күні өтетін салтанатты гүл шоқтарын қою рәсіміне арнайы шақырды.