Корпоративтік кештен қашқан шенеуніктер видеоға түсіп қалды

Әлеуметтік желіде Түркістан облысы білім басқармасының жаңа жылдық корпоративтік кешінен түсірілген бейнежазбалар әлеуметтік желіде таралып жатыр.

Otyrar.kz мәліметіне сәйкес, видеода бір топ адам дәмханалардың біріне жиналып, мерекені тойлап жатқанда, кенеттен полиция мен блогерлер басып кірген. Блогерлер мен полицейлерді көрген қонақтар беттерін бүркеп банкеттен асығыс шыға бастайды.

Видео авторы мектептер мен балабақшаларда ертеңгілікке тыйым салынғанымен, шенеуніктердің корпоративтік іс-шаралар өткізіп жатқанына наразы.

Бейнежазбаның авторы Түркістан облысы білім басқармасының басшысы Рахымбек Жолаевтың корпоративтік кешінен қашып бара жатқанын түсіріп алғанына сендіреді. Кадрда ер адамның көшеде оператордан қашып, көлікке мініп, кетіп бара жатқанын көруге болады. Алайда облыстық білім басқармасы видеода Рахымбек Жолаевтың жоқ екенін мәлімдеді.

– Бұл видеодағы басқарма басшысы емес, теріс ақпарат. Кафеге келсек, иә, онда қызметкерлер жиналды, оларға сертификаттар берілді. Басшы сәл аялдап, құттықтап, кетіп қалды. Ешкім карантиндік шараларды бұзған жоқ, - деп түсіндірді ведомствоның баспасөз қызметінің басшысы.

Кейін корпоративтік кештің видеосын түсіріп, әлеуметтік желіге жариялаған қоғам белсенділері сотқа тартылатыны белгілі болды. Белсенділерге қарсы арызды Түркістан облысы әкімдігінің қызметкерлері жазған.

Шенеуніктер видео мемлекеттік қызметкерлердің беделіне нұқсан келтірді деп отыр. Өйткені, санитарлық талаптар бұзылмаған. Ведомство өкілдерінің айтуынша, банкет заңды түрде ұйымдастырылған, мейрамханаға небәрі 50 адам жиналған.