Коронавирус пен соған ұқсас пневмониямен 947 адам тіркеліп, 7 адам қайтыс болды

Өткен тәулікте (16 желтоқсан) Қазақстанда коронавирус дерті ПТР арқылы расталған 788 адам, ал осы инфекция белгілері бар пневмониямен 159 адам тіркеуге алынды, оның ішінде 7 адам қайтыс болды.

Covid бойынша статистикаға сүйенсек, Ресеймен шекаралас солтүстік және шығыс аймақтарда эпидемиялық ахуал күрделеніп тұр. Өткен тәулікте Павлодар облысында 88 адам, Қостанайда - 70, Шығыс Қазақстан облысында - 69, Солтүстік Қазақстан облысында 65 адам ауруы ПТР-мен расталып, тіркелді.

Басқа аймақтарда вирус жұқтырғандар едәуір аз.

Коронавирус инфекциясын таратпау жөніндегі ведомоствоаралық комиссия ақпаратына сәйкес, өткен тәулікте Covid-тен 746 адам, ал пневмониядан 158 адам емделіп, ауруханадан шыққан.

Жалпы ел бойынша осы уақытқа дейін коронавируспен ауырғандар саны 144 523 адамға, ал соған ұқсас пневмонияға шалдыққандар саны 44 314 адамға жетті. Пневмония көрсеткіштері биылғы 1 тамыздан бастап саналады.

Ресми мәлімет бойынша, коронавирус пен белгілері соған ұқсас пневмониядан 2 613 кісі көз жұмды, қалғандары емделіп шықты. Дәл қазір 25 мыңға жуық адам емделуде.