Коронавирус адамды ерте алжытады: ғалымдар себебін анықтады

Калифорния университетінің (Дэвис қаласы) ғалымдары SARS-CoV-2 вирусы адам миына тез еніп, Альцгеймер ауруына ұқсас бұзылыстарды тудыратынын анықтады, деп хабарлайды Orda.kz.

Бұл Genomic Press (GenPress) журналында жарияланған зерттеуде айтылды.

«Зерттеу барысында COVID-19-дан қайтыс болған науқастардың көздің қарашығы (тор қабығы) тіндері мен дің жасушаларынан өсірілген зертханалық торлы органоидтар талданды. Ерекше назар вирус жасушаға ену үшін пайдаланатын екі ақуызға – нейропилин-1 (NRP1) және ACE2 ақуыздарына аударылды» деп жазылған зерттеуде. 

Сараптама нәтижесінде NRP1 ақуызы вирус жұқтырған науқастардың нейрондары мен глия жасушаларынан көп табылған. Бұл вирус миға көз арқылы енуі мүмкін деген гипотезаны растайды.

Тіпті COVID-19-ға дейін алжу (деменция)  белгілері болмаған адамдардың өзінде аурудан кейін бета-амилоид деп аталатын ақуыздың жиналуын байқаған. Бұл ақуыз нейродегенеративті өзгерістермен, соның ішінде Альцгеймер ауруымен байланысты.

Сонымен қатар зерттеу кезінде NRP1 ақуызына тосқауыл қоятын препарат қосылғанда, бета-амилоидтың жиналуы тоқтағаны байқалды. Ғалымдардың айтуынша, бұл жаңалық COVID-19-дан кейінгі «ақыл тұмандану» және басқа да неврологиялық әсерлерді болдырмауға бағытталған жаңа емдеу әдістерін әзірлеуге жол ашады.

Бұған дейін Ұлыбританияда жаңа коронавирус штаммы тарап жатқаны, оған тән ерекше симптомдар бары хабарланған еді.